Tree

ROODKAPJE TA HASI 69 ANA

Awa tabata yobe pisa prome dia ku mi ruman chikitu, Myrna Iris, a bai bewaarschool. Den pousa mi a bai mira kon e tabata pasa su prome dia. E tabata bisti den un regenjas kora. Su kapucha  kora riba su krulnan blont a hasie parse roodkapje.

Mes ora mi a mir'e mei mei di tur e otro muchanan. Komo nos tabata biba na Aruba, mayoria di muchanan tabata bruin ku kabei pretu of bruin.

Myrna tabata un aperensha speshal. Ora el a krese bira mosa, el tabata parse manikin. Asina ta ku nan sa pidi mi ruman bin hasi trabou di modelo. Un dia el a yega kas ku su wowo tur blou pinta. Mi mama ku sa gusta hasi chercha a puntra: ta ken a dal bo hasi bo wowo blou?

Myrna no a keda den kueta di modelo. El a bai Hulanda pa studio di enfermera na Zeeland, Middelburg.

Middelburg no ta hopi leu di Oostkapelle, e luga kaminda un di nos asendiente a nase. Ta e asendiente ei a trese e wowo blou i e kabei blont den nos famia. Ta esei so el a hasi. E no a tuma responsibilitat pa kwida su yu, mi tata, ni duna e yu su nomber. Aya na Middelburg Myrna no tabata un aperensha speshal. Sigur nan por a mir'e pa un Zeeuws meisje.

Awo ku mi ruman ta biba na U.S.A. nan ke bin kere ku e ta ferf su kabei. Un'ta koi hari?

Laga nos bisa asina:

tin masha hende no sa nada nada di nos historia. Nan no sa kon hende di deferente pais a bin na nos dushi islanan i a plama nan simia ront Antia.

Mi ruman Myrna Iris ta para modelo pa nos historia.