papiamentu papiamentu yu di solo mi ta kuidabo ku mi pèn mi ta gosa mirabo krese un tiki un tiki kada dia papiamentu yu di solo b’a pasa den hopi tempu malu nan kier a tenebo mas chikitu hasimi lubidá ku bo t’ei papiamentu yu di solo bieunan a tenebo bibu mustra ku bo tin potensha lesa tur bo eskritornan papiamentu yu di solo esta grandi ta bo forsa esta fuèrtè bo boluntat papiamentu yu di solo mi ta tesorá bo lus kora nunka lo mi lubidá kon kuèrdenan di kora a kumindami promé bes Bamako barbulèt a rondonami karisiá mi orea yena mi kabes ku koló profundo kòrá di sorpresa püs di rekonesementu bèrdè di amistat balansa blou gel di alegria t'e man k'a hala reda t’e man k’a hala reda skama piská has’e t’e man k’a planta maishi t’e man k’a hisa pidi shelu yobida k’a kòrta bencha mula t’e man k’a kibra pan pan di kada dia kada dia mi ta kòrda e man kueru mi ta spera ku nunka nunka e tempu lo yega nunka e tempu ku mi mester stèm mi dia sin zonid’i bongo sin zonid’i conga laga timbales lantami abanico mustra mi kurason ritmo di Congo pandereta habri mi brasa tambora kèinta mi pia quinto i tumbadora ripití mi orígen pa mi span altura di mi tono kaya 900 mi ta pasa kaya 900 el a kambia nòmber kambia largura un kansansia pa pia chikitu antes awe den sodó mi ta buska playground mir’e chuchubi asina nos tabata subi aire riba swing para liber para felis asfalt ta skibi un kuenta bieu kada sker un kode mi ta lesa bai pariba kara straño den kasnan konosí holó di laman ta guiá mi te na kueb’i Fontein warawara ta baha buska sefta bientu tera muda kuantu kuenta bo ta warda kuantu flecha bo ta skonde kuantu biaha lo mi bolbe identidat suponé Basta Makamba ta sigur ku mi ta un gran kòki ku mi ta usa un bòshi di konofló ku mi ta sufri di frialdat ku mi ta muri di hèimwe ku mi ta un baliadó fantástiko ku mi no sa nada di Bach ku nunka m’a mira un metrónomo ku mi no por lesa un bestèk ku Aruba ta un pueblo na Sürnam. Asina mi por sigui te mardugá. Algun ta puntra ki dia m’a yega si mi tin idea di bolbe mi lugá. Mi no ta hiba ni trese pa mi no desapuntá niun pushi. luna kontami luna kontami di Tula b’a lesa su buki b’a mir’e lucha b’a tend’e soña bou’i strea soña di libertat libertat’i warawara den aire liber libertat’i trupial riba kadushi libertat’i gabilan piskadó luna bisami kon firme el a para pa mi kòrda su ehèmpel pa mi para sin kai sin kai den perpektiva sin futuru pa mi perseverá tur mi dianan perseverá bou’i karbach’i bida Rogelia mei mei di un kantidat di pes’i seda b’a kumpli shete aña holó di kamfer pa bo ta sinónimo pa shantung organsa tafetan sala yen’i florero ku plum’i pòwis balia riba kuer’i tiger hari pa su wowo kargá hari pasobra su djente ta peligroso kana bula den hòfi yen’i eskultura despues hopi despues ùniko imagen riba bo retina e mucha di piedra kabes kologá patras un trosh' i dreifi riba su boka habrí Wega (fragmentu) Despues di warda, na kamind’i kas, nos karioka tabata yen di papiamentu. Kada trahadó tabata sa e storia mihó. Un tabata konta ku ta tur empleado di e kraker desgrasiado mester a bai pa un enterviu. Otro tabata bisa ku Tuyu a bai papia di e hòmber ku dos safety-hat. ‘Mihó e no hinka su pia den sapatu di otro’ un trahado a bisa. Un otro a puntra : ‘Fedjai ta liber awe ?’ ‘Nò, e ta na kas. Malu.’ Fedjai malu ? Fedjai tabata un hòmber duru. Nunka el a keda kas pa via di malesa. Lo ta e desgrasia a hasie malu. Anochi sintá dilant’i porta, mi a mira Tuyu ta bin. Mi a lanta habri porta di kurá p’e drenta. ‘Hòmber, mi ta kontentu di mirá bo !’ Nos a sinta. Tuyu a konta ku ta kasi sigur ta Fedjai tabata esun ku a sali na kareda ku dos safety-hat den su man. ‘E ta na warda di polis awor aki.’ ‘Bo ta sigur ?’ mi a puntra. ‘Mi mes a mir’e drenta outo di polis.’ ‘Tin hopi storia e dianan aki. Ayera nan a bisa ku polis a arestá bo.’ ‘No arestá, enterogá.’ Ora mister Johnson a drenta messhall, nos tur a stòp di papia. Bira nos stul pa mir’e. Mister Johnson a pone su mannan tra’i su lomba. Morde su lep. ‘Mi ta trese boso un notsia tristu, ‘ e di, ‘awe mainta polis a arestá Frederico Crus, mihó konosí komo Fedjai.’ Mi a tene mi rosea aden. Un silensio enorme a tapa nos. Mister Johnson a sigui: ‘Frederico Crus a pone barikada dilant’i porta di w.c. kaminda Eddy Hassel tabata, na ora di e kandela. Eddy a bai w.c. aya pasobra plumber tabata drechando e w.c. kaminda Eddy Hassel mes tabata traha Tuyu a kuminsa tosa. Esei tabata un señal pa mas hende tosa. Skùif stul. Supla nanishi. Ora tur hende a kaba hasi nan kos, mister Johnson a sigui : ‘Tur hende a sali na kereda ora nan a tende e pito di emergensia. Nos no ta sigur ainda ku nan tabata sa ku Eddy tabata será den w.c. Jack Peterson a tende gritamentu. El a bisa Fedjai e ta bai bèk pa mira ta ken ta grita. E no a bolbe mas.’ Mister Johnson a frega su frenta, despues el a sigui ‘Fedjai a tira Eddy su safety-hat afó.Polis a haya fingerafdrùk di Fedjai riba e sombre. Asina den poko dia nos a pèrdè tres trahado. Fredericu Crus tabata hunga wega ku Eddy Hassel. Un wega peligroso.’ Mi a baha mi kabes. Sera mi wowo. Bolbe habrie. Mi no tabata soña. Mi tabata lantá. Mister Johnson tabata papia. Mi tabata mira su boka move. Mi no por a tende loké e tabata bisa. fruta di laman kòra radiante bròns abundante gel luminoso bèrdè venenoso ros manera glas emoshonante den pikòp di su amigu nos ta bòsha rònt di dje fiha bista den wowo opal morto skucha muhenan ku hèmchi hòmbernan ta karga tarai resonansia di laman den nan harí hòfi ramanan muchu seku pa karga fruta holó di kashu a bai hopi tempu pasá su dedenan no ta den tera manera bichi e no ta konta nubia mas plega stòf hasi kenshi ku hos asina mes kosechá rumbo pena m’a reserva un biaha rumbo pena aki dos tres siman mi ta baha den holó di lamúngras drenta santana poko poko pa no stroba lagadishi pa no trapa yerba shimaron si mi kurason ta duna mi por yega te patras fin di berea aya lo mi kòrda e kansion ku nan sa kanta pa mi drumi aya lo mi bira blachi di mi hubentut aya lo mi konta ken a sobra aya lo mi pidi totolika konsolami pret'i wowo dushi drumi dushi nan di: bo tata ta un chòler bo wela buraché blo bati boka hasi beheit belá nan tur lo ta bo ta mi bolo pretu mi blenchi barbulèt beyesa di mi bida bonbiní mi bebi ta nan di : bo pars’un tòtèki pakiko tantu teima bo ta mama su tentalaria mi tuturutu tròsh’i trinitaria bo ta nan ta hasi ko’i kaweta papia yen di ko’i kèns kentura nan tur lo tin nan n‘sa ku bo ta mi korona kerid’i mi kurason mi kesitu aw’i koko nan tur ta kiboká ketu ketu dushi drumi sosegá nan di: bo boka parse chincha nan kabes ta chòk-chòk di chochoria chambòn sigur nan ta mi chogogo chupabèbè mama su chuchubi chibichibi chichiribichi richi richi chichiribichi richi richi nos ta manda Chiku dundunchi nan tras drumi dushi drumi mama su zjozjolí ser’e wowo pretu pipit’i tamarèin mama ta zonzá kansá caribbean sea jazz jazz a yega cas el a pone su pia riba santo blanco nortostpasat ta caricia su cabei cara pasuit e ta hole lama caribe encanta e ta bira cara panort soña di su cuna: New Orleans New Orleans ta bati den su sanger New Orleans New Orleans sin fin jazz ta hisa brasa cuminda pelican huntu cu parhanan ta bin e di promenan cu a para na su cuna Bunk, Buddy, Joe, Jimmy, Jelly, Louis, Earl, Freddie, despues esnan cu a mir’e crese Charli, Miles, Fats, Dizzy, Stan, Bud, Art, Oscar, Duke, John, Tadd, i mas jazz a yega cas solo ta pari solo fo’i trompet i tur su rumannan biento ta kishiki nan hasi nan hari te yora jazz a yega cas banzjo, kitara i piano ta yena aire hila, drenta coper klarineta ta anima, eksita, pusha tur bai ariba ariba, ariba percucion ta sigui jazz tin worksongs den tur su dedenan gospel den su pecho jazz a bolbe cas Mississippi i lama Caribe ta mescla na su pia sunch’e BONBINI sinku haiku flamboyan yama ayó, lagrima kòrá ta tapa tera ta den sekura kibrahacha su wals gel t’ei riba seru aloë spùit bo flor haltu pa barbulèt sa ku tin fiesta dos wairu blanku warawara ta move pa kumindá mi chogogo sin bo sigur nos lo a kansa di tantisma blou oloshi kèns ta or ’i spoki mal notisia sekura ta hasi foya yobe inundashon na oriente ta ken a tende oloshi bati djestres sla kantidat di hende ku borchi den nan man wèlgamentu shonnan ta hòrta di obrero ruman ta kuant’ or tin mi oloshi a para sigur payaso kara blanku pintá koló bibu bistí paso di chaparin ma bou'i un sonrisa makiyá ta skonde un lagrimá pèrtá lanta lanta stòp di gatia para mira na bentana mira nubia kambia kambia bira ber baka brabu rabu largu mèrdia den halá di solo mas kambio na kaminda tuma despedida laga tumba den atardi den halá di áwaseru tende spil konta aña kambia den serena mama mi wowo ta siego di doló mi kuchú mulá den lágrima ta kòrta bo kara fragil bo boka ku sa konsolá mi bo wowo pretu pipit’i patia fo’i e palu duru aki mi ta kèrf bo brasa delikadu ku sa zoyá mi den un otro tempu bo mannan ku holó di mango papaya i guyaba bo pechu pa fiesta dòrná ku kokolishi i kolónan di nos tribu bo lomba mi promé luga di reposo kaminda mi sa skucha bo harimentu kantamentu sa hunga ku bo kabei bo barika i kustia adikto na ritmo di tambú bo lombrishi anker di mi infansia bo pia e paso firme ku ta hasi falta tumba hep mané bongo sin sosiegu chapi tistigu ketu ta selebrá desde awó maraka wiri tambú tambe piano ta parasol saya di régenbog ta anunsiá solo zuai riba pasat bou’i un bokèt di nòmber oleander trinitaria kayena flamboyan rekuerdo ta haya un lugá ku sombra bo ta kòrda Bo ta kòrda E poko paso ku nos a laga atras Laga e bala purá den huki Inosente nos a drenta laberinto Pelikan ta sambuyá den aña sinkuenta Trese e wega ariba Mi tin gustu di haya e pasonan bieu Hunga jacks ku bo I hari Pòrnada E karta (fragmentu) Lola a saka e karta for di su tas, pone riba mesa di nochi. Drumi riba kama. Purba pega soño. E mester ta trempan na fligfèlt. Henter e historia ta pasa manera un pelíkula atrobe:nan a kòrda riba tur kos. E ùltimo biaha ku nan a reuni, nan a repasá tur punto. Dia promé ku Gran Marcha, nan lo bai buska nan disfras serka kosedó. Kada un apart. Tur tres tabata den un otro grupo. Lydia tabata barbulèt den grupo di insèkto. Lucy tabata un di e sinku piedranan presioso den grupo di hoyas. Lola mes tabata un di e sinkuenta damanan di honor den grupo di kuenta. Dia di Gran Marcha, nan tur ta keda kas, tòg Tanchi lo sali fo'i kas tempan i bolbe lat.Durante e marcha kada un ta bai riba su mes na momo Iki. I despues un pa un ta bai bèk kas, disfrasá i bai fiesta final. Sí, nan a kòrda riba tur kos. Tempu ta bòltu. Lola ta chikitu Ta kasi ora di bai kama.Yalusínan ta será, ma Lola ta tende e bientu furioso. Awe merdia no tin skol. Pa motibu di orkan. 'Podisé nos haya rabu dje orkan,' mamai a bisa, 'Islariba lo bolbe hay'e ful.' Mamai ta riba kama. E tin kentura. E ta tene Lola su man. Oló do mentolado ta yena kamber. 'Lola ora mi muri...' 'Mamai! Mamai no ta muri!' Su wowo ta yena ku awa. 'Awe mainta ora zùster a bin bañá mi, el a mira un barbulèt pretu grandi, riba mi stul di zoya. Esei ta mal señal.' 'Zùster mester a mata e barbulèt,' e ta yora,'mamai mi tin miedu, si mamai muri, nos tur ta muri. Ken ta bai mira pa nos ora nos no tin mama.' 'Boso tin basta tanta i un wela. Nan no ta pasa aki banda, ma ora mi no t' ei mas, nan lo kuida boso.' Lola ta supla su nanishi. Mamai ta ten'e na su pòls.'Ora mi bai, bo mester warda yabi di bo rumannan. Sòru pa bo tanta i omonan no mira e yabinan. Mi ta sigur ku lo nan tira nan afó.' E yabinan ta amuleto ku nan a haya dia nan a nase. Komo bebi ya nan tabatin yabi di nan kah'i morto. Asina spiritu malu no por a habri nan kaha promé ku nan a bira hende grandi. Mas despues, tempu Lola tabata den prizòn, e tabata sa soña ku e tres yabinan. E por a habri tur porta ku nan. Asina e ta sali fo'i su sèl anochi. Den klaridat di luna, e ta kana ku kuidou den anglo. Pia'bou. E ta kana den un mundu straño. Ningun dividivi. Ningun tuna. Ni un yatu. Kalma. Gel di anglo tur rònt. Su frei, Roberto, ta kana su dilanti. E no por pasé nunka. E no tabata yora pa momo Iki. Ta Iki a sòru pa mamai no haya su parti di erensia. Huntu nan a venga. Manera debe ser.E mester a yuda su rumannan. Pa mamai. Na kas bou'i ducha, e tabata tembla. Lydia ku Lucy tabata kalmu. E sí tabata mashá nèrvioso. Ora el a kaba di seka su kurpa, el a kuminsa saka. El a kai riba kama. El a sende radio. E no tin mag di pega soño. MALDITA CARTA, Beny Moré ta kanta na radio. El a bolbe wak oloshi. E mester bai fiesta final. El a lanta. Habri e saku di disfras. E no por a kere su wowo. No tabatin un peluka ku krùl blanku den dje, ma un ku kabei plamá. No un krinolina ros, ma un saya sushi bieu. El a pèrdè rosea. Pa mala suerte el a kohe paña di Cinderella. El a kai flou. Esta hopi tempu pasá. E tabata yòn i yen di speransa e tempu ei. E tempu promé ku e maldita karnaval. El a tira un bista riba e karta, poné riba mesa di nochi. E no tabatin ni un tiki soño. El a kohe e karta. Atrobe el a lesa Tanchi su handskref yen di krùl: Pa Lola lesa despues di mi morto. El a sker e ènvèlop habri. Hala rosea profundu. Kuminsa lesa. Nò! Nò! No por ta berdat. El a kuminsa pèrdè rosea. Kalma. Keda kalmu. No hiperventilá awó. Lydia a pinta su boka. E lepstek a kibra, kai.'Nos mester sali awó, sino nos ta yega lat.' Nan tabata para den fila.Ketu. Awa a kuminsa yobe. Lydia a pone su waiper traha. 'Bo sa bai misa?' Lydia a puntra Lucy. 'Ami? Lydia, Iglesia a brua nos. Prome palabra ku nan a siña nos tabata PAGANO. Bo ta kòrda? Nos no tabata batisá, awèl nos tabata pagano. KULPA i PENETENSIA. Bo ta kòrda? BON i MALU.' 'Ami si ta haya pas den misa. Mi ta bai ora no tin hende. Ora no tin sakrifisio di misa.' 'Si mamai lo a keda na bida, nos lo a bira otro hende. Hende felis.' 'Mi di mi ta haya pas aya.' 'M'a tendé bo.Pas pa un ratu.' 'Ki ta pasá bo Lucy?' 'Mi ta mira ku bo no ta bon. Bo por buska yudansa.' 'I rebibá pasado? Nunka!' Lucy a karisiá Lydia su man. 'Lo t' un alivio.' Enkuentro Tur anochi, ora Fichi spierta, nan tur t'ei kaba. Nan ta sinta warda manera semper. Su amiganan di skol. Tur yon manera nan tabata 50 aña pasá: Lola ku su saya largu bou di rudia, blusa di bordür blanku. Ina ku su kabei yen di krùl ku ta lumbra, hasi nan tur yalurs. Mara ku Eileen ta papia Ingles ketu ketu pa nan no lanta Fichi. E otronan ta hasi bofon di Sisi: ta dikon bo no ta bisti saya yu? Ta tin bo n' tin? Lola ta responde pa Sisi: e ke ta meskos ku su ruman hòmber. Un' ta asina Sisi? Buchi por hasi kiko ku e ke tòg? Un ta wak otro ma nan no ta bisa nada. Awor ku nan a tende ku Fichi a yega, nan tur ta drei kabes pa mira ta unda e ta bai sinta awe. Fichi ta pasa man den su kabei bruhá. Ta kon su kabei por a sali fini fini asina? Anto shon dushi e kabei ta asina tiki, ku un ' tin ko'i hasi kun'e. No por flegt e no por pone strek aden, no por krùl e. Ta di laga waya. Fichi a kuminsa papia sin warda nan keda ketu; mi skol ta bai sera. Mara ku Eileen ta puntra den nan Papiamentu kibrá: mi no tende kiko bo bisa. Lola ta responde pa Fichi: su skol ta bai sera. Lina ta mira ku Fichi su wowo ta yena ku awa. Fichi ta konta su storia manera kada dia. E storia ku tur su amiganan ta bin tende, pa nan diskutí despues. Nan aparensha ta di 14, 15 aña, pero nan ta papia ku otro, manera hende grandi di mas ku 50 aña. Esei ta nan edad berdadero. Fichi tin mas ku dos aña ta bisa nan ku si sigui asina, su skol lo tin di sera. Ma nan tur tabata sigur'e ku su skol lo no sera. Nan a duna konseho. Dos aña largu, i awe Fichi a trese mal notisia pa nan. Babuká nan a keda mira Fichi, ku ta buska un lensu pa supla su nanishi. Lola a saka un lensu limpi fo'i su saku duna Fichi. Ku man den skochi nan ta mira Fichi seka su wowo i tende e supla su nanishi. Nan a manda un karta pa nos awe. Den e karta nan ta bisa nan no ke un skol pretu. Nan a disidí ku awor ku tin mas ku 80 porshentu di mucha stranheru, a yega tempu pa sera e skol. Awor ta sigur sigur ku mayornan Hulandes no ta bai manda nan yunan na nos skol mas. Mi ta kere ku asina e 20 porshentu ku a sobra, tende di e desishon di direktiva, nan tur ta bai kita nan yunan di nos skol. Sisi a sinta ku dos man ta tapa boka manera hende ku a spanta, awor e ta puntra: kuantu tempu e skol ta keda habrí? Fichi su stèm ta tembla: te dia tres di yüli. Ina ta sakudí su kabes, su krùlnan ta balia manera ta na fiesta nan ta, pero enkontrario su stèm ta tristu: aki menos ku un aña? Mara ta sera su man na mokete. Su wowo kolo di kané ta skupi kandela: look at all the skolnan de stat, they got yen di skol pretu. Kiko pasa nan? Ora nan tur a desogá nan kurason, Fichi a sigui: si e hendenan ku ta traha na skol tabatin otro idea, sigur lo por a tene e skol habrí. Pero nan mes ta bisa ku nan no ke traha na un skol yen di mucha di tera afó. Si mi koleganan mes ta pensa asina, no tin awa pa laba. Nan no tin un idea. Bo a konta nan kuantu deferente nashonalidat tin na nos skolnan? Mira nos mes sintá aki : Arubiano, yu di Kòrsou. Mara ku Eileen ta di Grenada, mi tata ta Surnam... Lola ta furioso. Sisi ta sigui: Fichi i mi hendenan ta di Boneiru, anto nos tur ta biba sosega aki na Aruba. Ku kada palabra su stèm ta zona mas duru, awor e ta grita: laganan bin mira kon nos ta biba aki, kuantu, kuantu... su stèm ta kibra, e ta kuminsa yora: soketenan soketenan... Fichi ta brasa Sisi, nan ta zoya i yora sin stòp. Despues di un ratu Lola ta puntra:kiko awor? Fichi su stèm ta hers ora e respondé: no tin nada mas ku nos por hasi. Boso tur a yudá mi, konsehá mi, duná mi kurashi i forsa, hopi luna largu. Mi a lesa tur loke a sali den korant, tokante e kaso aki. Mi a kere ku pasobra tin skol pretu na tur tera kaminda tin... ay, mi ta fadá! Sisi di: Nos ta siqui bin tur dia serka bo. Sí, nos ta bai traha plan pa ora bo skol sera, bo no keda sin trabou. Awe nos ta desapuntá, pero poko poko nos ta bai uni forsa atrobe. Un otro a bisa: Nò, Fichi, nos no ta pone kabes abou. Un pa un e amiganan ta dun'e un brasa, un sunchi. Nan ta karisiá su kabei plamá. Ketu ketu nan ta desparsé. Ora e wèker zona, Fichi ta bira su kara riba su kusinchi muhá. Kuantu dia mas pa bai? speransa ai palu di mama mi testigu ketu den lucha m’a pèrdè mi mes pa mi esperenshá kwa maskarada kameleon di mundu ta karga mi lomba kansá ta haña deskanso kontra bo tronkon den tur soledat sunú m’a bolbe na rais pa mu kue mi mes huntu ku’n boluntat inkansabel flor’i flambuyan atrobe a nase den mi kurason tumá mi den bo protekshon palu di mama te ora mi tin forsa atrobe pa lanta e mondi grandi mei mei di kaya aya kaminda ambos palu ta brasa otro bira un pa Rosa si mi tabatei Rosa lo m'a yudá bo baha dje bús hibá bo mi kas kohe bo pianan kansá laba nan hunta nan ku krema di oló nos lo a bebe té hari sin sa ku e dia ei tabat'e kuminsamentu di un movementu Rosa b'a tene mi man Rosa b'a mustrá mi e kaminda Rosa b'a duná mi speransa nasementu di Aruba zoyando zoyando den skochi hundu di mama laman zoyando zoyando miliones di siglos zoyando zoyando den kalor akuamarino apertura submarino forsa natural aktividat volkaniko erupshon bou'i aplouso tremendo Aruba' nase baranka emponente bou'i shelu blou pariba un balèt sin fin di ola gigante pabou un sinta blanku rònt'i su sintura pasùit pasashi bientu yu di horkan panòrt panorama seku desierto hardin rokoso e ta yu di solo e ta pèrla stimá e ta chikitin sin par e ta tres Haiku kokolishi bin no skond'e bunitesa bou'i santu mas karkó zona sin lubidá di konta nos tur kuentanan bieu tin dia ora spil duná mi mi kara mi ta paga lus mapa tin dia mi ta habri mapa di pasado mi dede ta mustra e kamindanan kada hanchi konosí kada skina ku su historia kada kaya ku su doló kareteranan sin fin Papiamentu duna mi Poko lèter pa mi skirbi e pAlabra ku ta forma mi lenga Pa laga tende ku orguyo Inmenso bunitesa di su kAnsion rikesa di su tonal influeshiá pa varios idioMa madurá den basta aña El a haya su propio ideNtidat mira ku dies lèTer so ta sikrbi papiamentU mas ku'n enkanto poltrona di sinismo ata mi porfín riba kanapé bibitu den un empeño mi ta piskasem want'é want'é nunka famitu ma awó mi tin antoho pa kome dushi kansá di buska kataplasma mi ta ten'é reda bon será poltrona di sinismo m'a pasa rònt di dje sin mishi awe k'e kabes yen'i guruguru alma rampuñá bistí na halikein lesando mi paskin e poltrona ta tentá mi dos man yogan ta buska den sukuch'i hubentut ai laga mi topa ku maske ún memoria dje sofa bieu kibrá tres or mi heimwe sin fin ta soña bèl di skol tres or batí kòrtiku sombra kòrtiku ni ún yuana tòg rib'un muraya blek bashí ketu manera morto te ún wowo habri nos ta hari bai prikichi' kadushi ta grita brùg ta klen klan riba veranda kop'i kòkou ta kanta di Oostkapelle di Oostkapelle nan a bin pia blanku beibel na man beibel yen di nòmber un rei di Cornelis sin fin fo'i 17 mil te 19 mil pia kòrá basha simia sin wak atras si bo ke krese bo kuenta pia pretu un'tin luga pa bo den nan beibel futuru m'a mira nan kore na Yuana Morto Rooi Hundo Mabon Pos Chikitu i Mahuma m'a tende nan kanta na Camacuri Cumaná Bubali Tanki Flip bula na Alto Vista Calabas Paradera Piedra Plat tira bala na Daimari Bushiribana Urirama m'a mira nan sombra krese bolbe kremp Su Ultimo Komposishon (fragmentu) E flornan di oleander riba mesa tabata hole stèrki. Nan tabatin koló di e paña di mesa i di e lensunan di papel. Bèto tabata hunga ku su fòrki. Elisa tabata konsultá e menú. Despues ku nan a kaba òrdu, Bèto a hala su stul mas serk'e mesa. "Elisa, bo kier hasí mi un fabor?" "Kiko asina?" "Tuma e yabi. Habri e klùis..." Bèto a morde su lep, "mi no sa kiko mas." "Bon, despues mi ta yamá bo of mail bo." Bèto a demonstrá un sonrisa yen di alivio. Awaseru tabata bati kontra bentana. Un dia skur, kwator no a bati ainda. Elisa a sende lus, hisa temperatura di su verwarming un tiki mas. Sintá na su büró. Su glas di te kayente tené den dos man friu. Ela fiha su bista riba e paki brùin riba su büró. El a hinka su nanishi den e glas. Hole. Pepermùnt. Un boka un boka el a bebe su te. Ku un skèr chikitu el a kòrta e tep rònt dje paki... El a habri e papel gròf. Elisa a drenta ku un teblachi yen: kuki, te, suku, lechi, kòpi ku`skòter. Bèto tabata para wak pafó. Awa no tabata yobe. "Caracas, sí. New York, sí, ma no den wenter. Habana, sí. Ma Amsterdam? Nò. Nunka lo mi por biba aki." Bèto a bira wak Elisa. "Bo a kustumá di biba haltu asina?" "Mi tin mas ku trinta aña ta biba den e flèt aki. Mi gust e bista. Mi gusta biba anónimo." "Makamba ta diskriminá teribel! Ta kon bo ta dil k'esei?: "Bèto, manera mi a bisá bo biaha pasá. Mi ta biba mashá trankil aki. Ningun hende no ta haya chèns di diskriminá mi. Mi no ta akseptá ningun lokura. Nan mi trabou nan konosé mi bon. Nan ta tene kuenta ku mi." Bèto a bolbe na su stul. Henter e mesa kaminda el a sinta, tabata yen yen di partitura. "Mi ruman nunka kier a usa plèktru. Ta ku su uña e sa toka..." Bèto a bisa segun el a hisa e blachinan un pa un. E tabata pone mas atenshon p'e fecha bou e komposishonnan ku p'e musik mes. "M'a pèrdè mi ruman asina yon. Mi no tabata sa ku el a skibi tantisma musik...Nos ta un rasa plamá. Nomadas...Bo tin kontaktu ku bo hendenan?" "No bisá mi bo ke tende storia tristu." "Sí konta! Konta! Podisé bo storia ta konsolá mi." Elisa a bai kohe un àlbúm bieu frañá riba mesa. Habrie. El a bira e blachinan yen di pòtrèt gel blikiá. Na un grupo grandi rònt di un bolo, el a stòp. "Mi famia. Mama ta sinta band'i mi. Su man riba mi skouder. Su yu chikitu. Su konsuelo. Mi tata. Mira. Sintá band'i su ùniko yu hòmber. Tenedó di stambom. El a bai traha afó. Kasa kuater biaha. Tristesa di mama i tata. Mi no sa unda e ta awor. Esun ku ta hasi ko'i klòwn mi tras ta mi omo." Elisa ta baha su kabes, p'e wak si e por mira omo su tutpek. "Sinbergwensa. Krus di mi wela. Band'i dje, mi tanta. Tantan tabatin mashá gana di kasa. E sa tin un lachi yen yen di revista ku moda di brùit. Ningun yònkuman, no tabata na smak di mi wela. Pober tantan, mir'e ku su kara di brùit pashumá." "Ken esei? Esun kabei kòrtiku?" "Mi ruman k'a muri na Colombia...Mira mi tata su kabei. Blanku blanku. Figurá bo ta kuarenta aña el a hasi. Mira su kara. Un hòmber trahá di nèrvio. El a traha duro pa nos. Mi tabata muchu rebèlde. Mi no por a komprond'e...E dosnan ku strek grandi ta mi rumannan ohochi. Nan no a permití ningun hende den nan mundu. Te awe. Ai! Mi no ke sigui. Mi no tin famia mas. Despues ku mama i tata a muri, mi no a mira mi rumannan mas." Elisa a dal e álbùm sera. "Sòri," Bèto a bisa, "mi no mester a pushá bo." "No wòri, mi ta lòs di mi famia. Hopi aña kaba." "Bo storia ta mi storia. Ma mi a kòrta tur mi laso promé ku mi tata i mama a muri. Ami ta pió ku bo." "I bo a biba felis? Hasi loke bo tabata ke?" E renchi (fragmentu) Cato i Ans ta drumí kant'i laman. Solo ta reflehá riba nan kútis ku ta lombra brùin. Bientu ta supla saka kokolishi fo'i bou di santu. Laman Karibe ta lembe na nan ded'i pia. "Cato, mi no sa muchu kos di e herensia di e renchi ei. Mama ta kere ku t'ami a fi'e pa prònk kuné na un di mi fiestanan. Ma keré mi, mi no a fi'e ni mi no tin nada di haber ku su disparishon." "Mi tampoko no sa nada nada di e renchi ei. Mi ta bai landa un ratu. Ramon ta bin buská mi djis aki." "Bo sa mashá bon ku bo no mag di sali ku Ramon." Cato ta den awa kaba. Akwamarino manera su trahe di baño, bèrdè manera su wowo. Ans ta bula bin band'i dje. "Cato, bo ta riska! Bo ta buska pa nan manda bo bèk Hulanda. Anto ami ta keda aki sin ruman." Cato ta skupi awa manera un bayena. Ans ta sigui ku su kuenta. "Bo tabata sa ku e renchi ku nan a pèrdè ta di mama su bisatawela? Ta un renchi pa hende hòmber. El a hañ' e seka su tata dia el a kasa. Bo sa ku ta for di Ghana el a trese e renchi?... Parse ku tempu k' e tabata bai bin pa negoshi na Afrika, e tabata trese mashá prenda eksótiko. Tur a bai pèrdí... E símbolo di Adrinka ei so a sobra... ...Bo ta skuchá mi? Mi ta kontá bo algu!" Ramon ta para ta zuai ku un sèrbètè. Cato ta kore sali fo'i awa. Ramon ta lor'e den e sèrbètè. E ta ten'e bon brasá. Nan ta hunga wega peligroso. "Ta unda nos tarawela a sali ku un renchi fo'i Ghana? Kiko Adrinka ke men? Bo por bedei mi?" Mi ta puntra Bea. "Segun tante Ans, e renchi ta fo'i temp'i sklabitut. Adrinka tabata un rei di Afrika Oksidental. Awendia nan ta yama tela di katuna imprimí ku e símbolonan Adrinka. - Adrinka-cloth-. Antes nan tabata usa e pañanan ei pa dera morto aden. Despues nan a kuminsá ta usa e símbolonan riba tur sorto di opgeto, manera kalbas, renchi etc. En todo kaso e renchi ku e símbolo di speransa a pèrdè, tempu tantenan tabata biba na Kòrsou. Tante Ans semper a kere ku tante Cato tabata sa na unda e renchi a keda." Diripiente mi tabata mira e renchi di oro dilanti mi. Na Ramon su dede. Un renchi ku un símbolo. Mi tabata mira su man riba e kaha di morto. Nò, mi ta sigur ku no t' ei mi a mira e renchi. Ta na kas di tante Cato! Sí, aya mi a mir' e. Bea ta papia i papia. "Bo ta skuchá mi? Mi ta kontá bo algu." "Sòri, mi tabata pensa leu. Mi tabata na Kòrsou," mi a kontest' e. Sintá ku Ramon su tarheta di bishita den mi man, mi a yama Kòrsou. Ramon. El a keda sorprendé. E tabata preparando pa biaha pa Accra. Tres dia despues mi a top' e na Ringway Hotel na Accra. Kontentu el a brasá mi. Un musik agradabel a saludá nos den restorant. E takadó di kora a habri wowo hanchu ora el a mira Ramon. Ramon a batie riba su skouder. Tabatin un mesa reservá pa nos. Celia Cruz stèmI mi no por pintá bo den koló di rumba guajira i guaguanco den splendor di peluka i payèt mi no por kòrtá bo den forma di bolero ni son montuno den zonido di un bahá di solo karibense ma mi por baliá bo den ritmo di azúcar mi pianan ta marka bo stèm stèm II bo stèm ku èko di koko akordo di mango tono di kaña resonansia di anasa bo stèm ku kadans di amandel synkope di papaya mat di guyaba melodia di tamarillo retumba di limon bo stèm rin di shimaruku zonidu di kiwi bo stèm azúcar stèm III konga i tumbadora ta bòltu ofer triangulo i pandereta bongo clave i maraka ta lora kaleidoskop di salsa Cuba ta bufá ultramarino Venezuela ta sali na bloupouwis Puerto Rico ta hari bloubèrdè koper ta zona sirkulá provoká bo bo ta warda amaranto zoya azafran silensio ta subi ata... bo stèm azúcar promé di yüli awe e barku k'a ranka nan fo'i nan kurá ta nabegá desastroso den mi laman ta sut'e bientu ta yor'e kalamidat bela ta bati salba nos salba nos ola di odio ta lanta kabes kibra den mil gota orguyo forsa blas di habon bo t' e úniko ku por sufri semper duele p' e deseo perdí den goso spera nunka sábi bisía na pèrdida tempu desonrado enkuentro kuahá den un momentu so e dia ku arogansia di siglo ora oloshi a wèlga ku maña pa nenga nos despidí bo t' ei den mi huki di wowo bo t' ei na rant di mi soño bo t' ei den tur poesia bo t' ei den mi brasa bashí amistat amarga b'a purba trose mi lenga pa mi papia bo idioma kanta bo kansion fastioso ranka mi lep pa mi sonreí sin stòp bruha mi kabes na bo estilo bistimi bo bachi pisá b'a eksigí pa mi yena bo tinashi te na rant piki strea yena makutu kòrta tur mi rosanan dòrna bo kas tira na mi kara sala yen ku mi n' ke balia bo tambú pa Kathinka tin dia mi ta mir'e na marche e ta yena saku ku tomati bakoba berehein mi ke bras'e ma mi sa k'e ta disparse laga saku bashí den mi soño sí nos ta kòmbersá hari yora bolbe hari mas bibu ku ora e tabata na bida kabaito den solo bo spilnan ta kinipi wowo yama mi bin skohe bin skohe un kabai un ros òf un blou un gel òf un blanku sia di oro stribu di plata rienda dòrná ku pèrla speshal mi ta brasa bo kabai blanku sunchi tur bo kabei subi baha drei rònt rònt rònt den mi kaleidoskop subi baha drei rònt spat strea spat luna spat tinguilinguibòks subi baha drei rònt rònt rònt tene mi na laria tene mi den soño tene mi den mi kaleidoskop lágrima ros ros mi dia a habri awé bientu fresku a poné mi rib' un seru si ta' tin nubia mi por a piki nan b'a trese granatapel na granèl lora basha den mi skochi b'a kriá mi gota pa gota yena mi boka ku lágrima ros angel leu di Pasku angel a bati na mi porta tolondrá mi kinipi su wowo yena mi ku lokura rebòltá mi sistema lora mi sosiegu bula bai kuné mi ta supla pluma pluma pluma felisidat solo ku luna ta pusta poné den klaridat konta su historia kon el a dirti den fòrnu speshal purifiká den kandela fuerte líkido suplá den forma delikado kuahá den eksistensha realtivo man yen di nada ku man yen di nada m'a sali fo'i un soño kokocha henter dia buska intenshon riba rut'i Boeddha map'i Krishna Chopra kana kamind'i Nagy Bessell i Watzlawick yega kas bon kansá un tiki dje 'saki un krenchi dje 'saya den mi baul onima eko sin fin pintura di un tempu notisia òf plegaria símbolo òf grafiti ken ta desifrá koriente di aire na mi kara un sombra pasando pasonan dja leu lastro ku ta inspirá tur dia mi ta pèrdè tur dia mi ta pèrdè tur dia un tiki mas holó dje kas kaminda m'a gatia lanta para na bentana mira nubia kambia bira ber baka brabu rabu largu mira mansa kambia bira pan kayente panlefi drikidèk tur dia mi ta pèrdè tur dia un pida mas kaminda frañá pa skol misa i trabou mira bida kambia bira mosa adulto pensionado tur dia un pida mas Dos Man Püs (fragmentu) Pará dilanti di spil Ruby no ta rekonosé su mes. E parse un mùmi. Su kabes ta tur lorá den verbant. Loke nan a laga habrí ta tres skrèf: un pa su wowonan un p'e nanishi in un ront di su boka. E ta flòsh e w.c. Laba su man. Mishi ku su nanishi bruin. E lo rekonosé su mes aki poko dia, ora dòkter kita su verbant? Tempu e tabata bai skol, semper muchanan tabata tent'e. E ta kòrda un be e tabata sinta na suela ta hunga djèks. Un mucha a mishi ku su kara bisando: "Si bo no tabatin e kos ei na bo kara, lo bo tabata mashá bunita," Ruby a lanta kore bai kas. Mashá el a yora e dia ei. E ta kòrda loke su Wela a kont'e dia el a bai tuma despedida, pa e biaha pa e operashon na Hulanda. Tambe e ta kòrda e karta ku el a haña den kashi di su mama defuntu. Un karta ku un storia inkreibel... Un hende ta bati na porta di w.c. "Mevrouw Yanga? Bent u daar?" "Ja!" "Alles goed?" "Ja!" Ruby ta habri e porta ku un sonrisa doloroso. Ai! El a lubida ku zuster no por mira su kara. Zuster ta puntr'e kon e ta sinti. E ta kontesta ku e no a kere ku e por a sali di kama kana asina lihé. Zuster ta tene su brasa. Hib'e na su kama. "Blijf niet te lang op de been, het is uw eerste dag." Zuster ta sakudi su kusinchi. "Kijk een berg post voor u." Zuster ta tene su pòls. Tuma nota. Sigui p'e otro pashènt. Por fin delaster bishita a yama ayó. Ruby ta bebe su te ku un rietje. Mira zuster habri bentana. "Lekker weertje!" Señora Janssen ta bin un pia un pia. E ta keda para dilanti di Ruby su kama. "Mevrouw Yanga..." "Zeg maar Ruby." "Ruby! Wat een mooie naam." Mevrouw Janssen ta konta ku mayan nan ta kita su verbant. Mevrouw Janssen ta tene su pechunan, grandura di dos futbòl. "Dan heb ik prachtige borsten." Ruby a sakudi si kabes ku kuidou. Janssen ta kansa hende ku e mesun storia, e mesun storia: kon kontentu e ta ku por fin e por bisti bikini. Kon e ta alabá su kasa, ku a regal'e e operashon dia el a hasi kuarenta aña. Segun señora Janssen ta papia sin hala rosea, Ruby ta len atras den su kusinchi. Len atras den tempu. Sinku di yüli dosmil. Solo tabata haltu na shelu. Un yuana bieu tabata keinta su kurpa riba kura di bisiña. Wela tabata zoya den veranda. E tabata tene un glas di ice tea lorá den un lensu di papel. "Yamami asina ku bo yega Hulanda." "Sí Welita." Wela a stòp di zoya. Pone su glas bashí riba e mesa di kabana. El a kuminsá konta kon dia Ruby su mama, Osefa, tabatin djes aña, Welitanan a bai piknik na Grapefield. Un dia yen di evento straño. Welita tabatin tres yu e tempu ei. Osefa tabata mayó. E dosnan chikitu tabata mucha hòmber. Ta pesei Osefa a pidi su amiga Norma, bai huntu ku nan. Norma i Osefa tabata parse ohochi. Fo'i tempu ku nan por a gatia, nan tabata hunga huntu. E djadumingu di piknik, tur dos tabatin un bikini bloubèrdè bistí. Nan tabata buska kokolishi pa nan reig kadena.Welo a bai keiru kant'i awa ku e muchanan mas chikitu. Welita tabata lesa LAGO NEWS. Ora el a hisa su kabes wak ront, Norma ni Osefa no tabtatei. Welita a kana ront yama nan. Ningun kontesta. El a bai buska nan den pal'i drùifnan ku tabata krese bahito, trahando lugá pa skonde. Nubia a kuminsa tapa shelu. Tapa solo. Bientu a kai. Kalma. Nuebe warawara a keda kologá un ratu den un serkel asina abou, ku bo por a mishi ku nan. Diripiente nan a subi shelu i bai baha den un huki pegá ku e kueba di Fontein. Welita a hisa su brasa, zuai p'e kohe atenshon di Welo kant'i laman. Ora Welo a kore yega, el a puntra si Welita a mira e warawaranan. Nunka nan no a mira asina hopi huntu. Welo di: "Laga nos bai kas, wer ta kambiando. Unda Norma i Osefa ta?" "Ta pesei mi a yamabo, mi no sa na unda nan a bai." Welita a tira un bista riba su oloshi. E oloshi tabata kore manera loko. Un, dos, tres ora den un minüt. Despues e oloshi a para sin kana nunka mas. Den un rato Welita a mira Osefa i Norma ta bin fo'i direkshon di e kueba di Fontein. Nan a yega ta hari manera kechín. Nan bikini i nan man tabata püs di drùif, ma nan boka tabata limpi limpi. Nan no ke a bisa kiko nan a bai hasi aya banda. Rosa (fragmentu) Promé biaha ku mi a mir'é, tabata kant'i laman. Na Estoril. Portugal. Pia' bou e tabata kana bende rosa kòrá. No tabata kaminda ku bo ta ferwagt un mucha yon asina ta bende flor. Poko dia despues mi a bolbe mir'é na un feria. Aya tambe e tabata bende rosa kòrá. E tabatin un par di kèts fraña na su pia. Su shimis di strepi kòrá ku blanku, tabata sushi i machiká. Su kabei mal kòrtá. Ora el a puntrá mi si mi ke kumpra un rosa, mi a saka mi pòtmòni mes ora fo'i mi tas. Mi a tuma mi tempu pa saka e plaka largá un pa un. Mientras tantu mi tabata opservá e mucha. Parsé mi ku e no tabatin mas ku dies aña. Su brasanan flaku tabata brùin. No di solo. Sushi. Akí na Portugal, hopi biaha mi a mira mucha ta bende tur sorto di kos ku turista. Esei no tabata nada partikular. Ma e muchanan tabata mas grandi ku esun akí. Ku kabes bahá el a para wardá mi saka e Eskudonan. Un aire straño tabata kologá ront di dje. Ora mi a pon'é plaka den su man habrí, el a hisa su kara. Mi a mira un par di wowo grandi. Bashí. Un nanishi yen di purunchi. Un boka ku no a siña hari. Un mucha ku nunka a biba den mundu di hubentut. Mi a tuma mi rosa i dun'é un sonrisa hanchu. Ekspreshon riba su kara no a kambia. Mi a disidi di siguié, pa mi haya sa mas di su bida. El a kana pasa un rei ku tabata warda nan bùrt pa kumpra katuna ros. Un pia un pia el a sigui zeilu mei mei di e multitut. Diripiente el a kuminsa kana mas lihé. Ku trabou mi por a keda serka dje. Ora el a bira bai tras di un kabaitu inmensu, mi a pèrdié. johnnycake johnnycake na kada skina ma leu di kas pargo fresko na tur marshe ma yobida si n' ke stòp klòk'i misa djadumingu ma ni un belo blanku ni pretu lesa Lauffer lesa Gibi lesa Nydia lesa tur siña skibi mi idioma na biehes di sarampi nunka mi n' ke paga ple ma ata mi aña largu den kurá di shon man inútil mannan inútil den su skochi kransnan na su pia ta plama holo di rosa e kaha ta será e ta mir'é bistí na kòrá barbulèt ta buska honing ku kuidou el a koh'é bolbe lag'é bai mannan inútil den su skochi regreso den kayanan bandoná ekonan di pasado ta pega na asfalt moli nos ta bai Hulanda den bapor franses chuchubi a profetisá na nòrt tin porvinir luna ku solo laga mi pasa mira m'a bolbe mi kas bieu ta bùk siegu di bèrgwensa yabi ta kibrá tur porta ta será kushina yen di rekuerdo pal'i funchi ku mumunchi a traha p'e regalá mi esta bon e palu ta ai kasuela di mi wela e ta lombra pretu pretu ai kasuela di mi wela traha repa ya bo sa pal'i lele di ma meme e ta lel'un giambo bon pal'i lele di ma meme ta korona so en'tin i konfó di shon dó mi ta usa tur atardi i konfó di shon dó e ta keinta ku hopi smak poron i koko di kompèr pa mi prònk den mi kushina poron i koko di kompèr pa mi sá di mi origen e mortero di madrina pa mi bati pa mi meskla pa mi bruha pa mi garna e mortero di madrina bati bruha machiká konofló i promentòn alkapara yerb'i hole bati bruha machiká machi ku machi machiká ma ma machiká machiká sapatiá muhé, vrouw, woman, mujer, femina, femme, frau, mulher, donna, kadun, mra, jin quó, basia, uma, duná mi bo man ban balia sapatiá spièrta mundu kansion mi ta kanta bunitesa bunitesa di mi isla di mi isla yen di para yen di para kolorido chibichibi i chuchubi chinchirinchi trupial totolika warawara kinikini i chogogo mòfi blenchi i prikichi buladeifi i patrushi lora chonchorogai bubi lopi redadó gabilan piskadó skèrchi ganshi krabèchi snepi muechi garabèt garza blanku garza blou gripitu i kaw kaw pat'i aña shon piet mi ta kanta bunitesa bunitesa di mi isla di mi isla yen di para yen di para kant'i awa den baranka riba palu yen di para di koló pakiko bo n' tei ma bo tei tur dia tur ora semper na kareda wowo travieso kabei plamá man sin sosiego b'a torpedia mi soño hòrta mi apetit lagá mi na laria sin parashüt diner dansant dunami un rep'i pampuna repí pampuna ku' n tumba kayente su tras bashami un sòpi mondongo sòpi mondongo ku'n son montuno sin stòp hasa'mi un pargo fresko pargo fresko ku'n cumbia sabroso su tras stobami un kalabas kalabas ku 'n wals di Padu tur rònt korta 'mi un bolo pretu bolo pretu ku 'un ponchi crema òf dos e-mail pa laman@karibe.com ora bo dornami ku lima pone kokolishi na mi pia spat muha mi bikini djis pa tentami ora bo papia bloubèrdè tuma despedida emoshoná kòrá mi ta sigur:bo ta stimami kariño Frida fado tantu pena den un kitara so tantu lagrima den un kuèrde so kulminashon den gritu di un kurason trapá Brùit sin brùidehòm Djaluna mainta 8 or i mei. Radio riba frigider ta yena kas ku un guaguanco: Yama tur bin lembe. Holo di pruim ta manda. Meme ta laba su man. E ta bisa Rina: "Awo mula tur pa mi." Rina ta mara su forskot. E ta pasa man riba su barika. Rina ta mira e baki grandi yen yen di pruim, rasenchi, dadel, konfeit di papaya, konfeit di lamunchi i di apelsina. "Ta bolo pa kuantu hende esaki ta?" "Ta un liber di kada fruta. Ta fiesta grandi famia Morena tin yu!"Meme ta midi dos kopi di brandy,dos kopi di krema di kakao. E ta drei wak Rina. "Mi tin basta dia sin mira bruit. Bo a mire e dianan aki?" "No, ma mi a tende mai bisa: basta no ta den Montekristu e ta atrobe." "Anto si fiesta ta frakasa, "Meme ta bisa. E ta habri un bleki di lechi kondens. "Bruit tabata den Montekristu mas biaha?" Rina ta puntra. "Ta kuantu aña bo tin Rina?" "Mi ta bai hasi djesshete." "Ora bo ta mucha, bo no ta nota e kosnan ei." "Meme mi no ta mucha!." "Tempu ku bruit tabata den Montekristu bo tabata mucha."Meme ta bruha rom, kané, notmeskat i vanila. E ta kuminsa konta: "Prome biaha ku Favia a bai Montekristu, henter famia a sera kurpa den kas. Ta kria tabata sali bai kumpra tur kos. Un siman despues nan a saka Favia foi Montekristu i nan tur a bai Benesuela. Despues di tres luna nan a bolbe ku baul yen di paña nobo. Favia a keda Benesuela. Nan di Favia a keda studia aya. Rina ta kore sali foi kushina. Man na boka. Meme ta hisa kara. Un webu den su man. E ta kibra e webu. tire den un konchi. E ta sakudi kabes. Muchanan di awendia. Fiesta te lat. Bebe di mas. Rina ta drenta kushina. Wowo kora. E ta hole zur. "Mi ta kere mi a kome algu robes." Rina ta bebe poko awa. Sigui mula e frutanan. Mayan e tin di bai dokter. E ta nervioso. Kiko dokter ta bai bise? E ta puntra Meme kuantu tempu Favia a keda Benesuela. Segun Meme ta bati e webunan e ta sigui ku e kuenta: "Despues di dos aña Favia a bolbe kas. El a haya trabou na banko, kaminda su tata Sr. Morena ta direktor. Rina ta kai sinta na mesa di kushina. "Mara mi tata tabata direktor di banko." Meme ta stop di bati webu. "Por ta ku bo tata tambe ta direktor di banko." Rina ta sakudi su kabes. "Mi no sa ta ken..." E ta pone man na kabes. Kiko dokter ta bai bise? Si ta asina, ta ken ta tata di e yu? Rina ta lanta para. "Meme ta kuantu bolo nos tin di traha?" "Rina, mi no ke korda bo sa?" Meme ta bati e webunan duru. "Mi ke kaba traha e bolo pretu awe. Djarason nan ta bin korta bolo. Mara bolo." Rina ta prop fruta den e molina. Ku lomba pa Meme e ta bisa: "Mayan mi no por bin trempan." Djamars mainta 8 or. Awa ta stofia. Meme ta den kura ku un serbete riba su kabes. E ta korta yerba di hole. Chuchubi ta kanta: Partibien! Partibien! Meme ta habri wowo hanchu. Chuchubi a trese mal notisia. Meme ta wak oloshi. Den kushina e ta kita papel di waks foi riba e bolo pretu. Ku kuidou e ta mishi ku e bolo. E bolo a sali bon bon. Meme ta midi suku i manteka. E ta traha lihe. E ta puntra su mes: ta kuantu bolo lo mi a traha den mi bida?. Bolo pa boutismo, pa risibimentu, pa konfirmashon, bruit, boda di plata... Batimentu na porta. Rina. Wowo kora. E no ta hole zur. "Bo a yega net na ora. Mi a herebe yerba di hole pa bo bebe. Drecha e stoma. Meme ta basha un kopi di yerb'i hole. "Ora bo kaba bebe, mula e kashipete pa mi." Meme ta raspa kaska di lamunchi. Su kadena ta kita kai. "Ai, mi kaori!" E ta buk. Kohe su kadena. Rina ta bin para banda di dje. "No dokter di wowo."Meme ta hari. "Dokter di kabes. Sikiater." Meme ta bati e blanku di webu steif. E ta blanku bunita. Manera kola di bruit. Meme lo ke sa si Favia ta kasa na blanku. E ta sigui su storia. "Si Rina, tur Favia su rumannan a kasa. Favia so no por a haya un yonkuman. Na kuminsamentu, kabayeronan tabata para na liña pa palabra ku Favia. Ma un pa un nan a safia. Dos a kasa ku ruman di Favia." Meme ta seka sodo foi su frenta. "Tur dos a muri den prome aña di nan matrimonio. Nan di ta kuminda venena e hombernan a kome. Ma nunka nan no a haya e kulpabelnan. "Kokolishi di unda esaki ta? Nunka mi no a mira un asina." "Rina bo tin di wak ront mi yu. Ta hopi hende ta bisti kaori awendia. Ta un seña, ku ta di Afrika nos ta." Rina ta kana bai bek na su molina. "Ami ta sanger di Indian mi tin." "Rina mi yu, ora bo pasa banda di spil, wak aden. Bo kabei, bo nanishi, bo lep..." Rina su lep ta tembla. No, mi no ta bai yora mas awe. Laga mi pensa riba algu otro. E ta puntra: "Kiko a pasa despues ku Favia a bai traha na banko? "Meme ta bisa: "E tabata bai bin Caracas. Tur hende tabata sa ku ta dokter e tabata bai." "Ki dokter?"Meme ta kibra webu. Separa blanku foi e dornan. Segun Meme ta konta, Rina ta bai bek den su memoria. Aña pasa el a topa Chuchu na carnaval. Nan a balia henter anochi. Rina a lubida di wak oloshi. Tumbanan tabata yena su kabes. Chuchu tabata tene duru. Yena su orea ku palabra dushi. Nunka ningun hende no a yame: prensesa, suku di mi alma, rosa di mi kurason. "Rina hunta dos forma grandi pa mi." Rina su kabes ta leu di kushina Wiski di mi boka, Chuchu a yame. Ora Rina a wak oloshi el a spanta. El a bisa Chuchu ku e tin di bai. Chuchu a tene mas duru. Rina a ranka bai. Chuchu su tras. "Mi ta hibabo kas." Den un hanchi el a kuminsa sunchi Rina. Yena su orea ku mas dulsura. El a pasa man bou di Rina su blusa. "Mi tin di bai kas." Mi ta hibabo dushi". Mi ta hibabo djis aki. Ma prome mi tin un kos speshal pa bo. Fula Fula. Bo ta un angel ku a kai foi shelu." Rina ta laga un forma kai.Hasi masha bochincha. Rina ta spanta. Buk. Kohe. Meme ta konta: "Ningun hende no a mira bruidehom ainda.Parse ta Benesolano e ta." Meme ta hala un fofo pa sende e fornu. Ku un sonida rabia e fornu ta kontesta: BLUB! Rina ta konta su amantenan kaloroso. Despues di Chuchu a bin shon Pe. E tabata kumpra sapatu bunita pa Rina. Sapatu kolo di oro. Kolo di plata. Sapatu dorna ku kuenta kora ku blanku. Tur tabata sapatu hilchi haltu. Despues di shon Pe a bin Baby. Baby por tabata su tata. E tabatin reibeweis. Ku baby Rina a mira henter e isla. Nan a bai te boka kokolishi. Meme a basha e beslag den dos forma.Hinka nan den fornu. E ta duna Rina e konchi bashi. "Bo ke lembe?" Rina ta sakudi su kabes. Traha kara mahos. "Bo stoma ta malu ainda? Bo ke un tiki sopi galiña?" "No mi ta prefera un beker di yerbi hole." Sinta na mesa Meme ta bisa: "Nos falta dos tert di koko awe. Mayan mi ta dorna e bolonan. Djabierne ta fiesta. Rina ta mira su mes tur na blanku. Krans ku wal. Kola sin fin. Chuchu, shon Pe, Baby i mas bruidehom ta para na porta di misa. Rina tin di skohe un. Ora e kuminsa kana den nan direkshon, tur bruidehom ta disparse. Djarason Rina no a bin juda Meme. Djaweps 8 or pasa. Awa ta pinga. Chuchubi ta skonde den veranda. Meme ta mara su forskort. Sende radio. Un stem profundo ta bisa: segun informashon polisial ofisial, investigashon a saka na kla, ku señorita F.M. a venena su novio S.A. na Benesuela. E pareha tabata bai kasa djabierne na e isla natal di e brùit. e pida tera seku aki e pida tera seku aki kaminda m’a grita mira lus kaminda m’a kima plant’i pia den mèrdia pargata na man pa mi por kore kai raska rudia e pida tera seku aki ku su tuna sin pordon su yatu brasa haltu pa prikichi sinta lusa den e solo shishi kaminda watapana un’ por nenga bientu kaminda roi ta yora pidi yobida e pida tera seku aki mi Ruba kalgura (yu di kalakuna i sangura) mi mama di stòp di yora sea kontentu ku niun hende n'ke kome bo pa pasku debi na bo pia fini fini manera hilu mi mama di sea felis ku bo ta pone webu den renbak ta ken ke hòrta webu muha bai mula bo pik stòp di yora mi tata di siña zumba cis pa nan sa ta ken bo ta tata di ataká musketera traha buraku ku bo pik hasi wela bula balia babuká kon m'a drecha nos famia ta kon bo ke bisa b'a biba ta kon bo ke bisa b'a biba si bo n'dobla den orkan di soledat si bo n'yora feneta lensu yen si bo n'soña di dulsura lanta kome piedra si bo n'shorotá amor yega haña kabuya kòrtá kurason kibrá t'e uniko kurason hinté despedida fo’i su kara transparante bida ta kore bai poko poko mannan antes asina delikadu awor pergamino machiká manchá inmóvil rib’e laker inmakuladu e ta drumí haltu rib’e kama straño inalkansabel mi ta supone ma ora e habri su wowonan mi ta sigur mi no a yega lat mi ta sunchi su kara hundu susurante e ta konta mi su bida mi ta skucha ku heimwe pa pasado kaminda nos bid’a kai huntu e tin pregunta pero min’tin kontesta den su wowo mi ta ripará k’e no ta spera respuesta mi ta preokupá konsiente ku mi mester lagé bai mi ta tene su man rekorda mi hubentut kasi tur dia e tabata presente un muhé ardiente un kurason asina grandi ei mi tabatin un refugio segurá blenchi riba galeria blenchi riba galeria mi ta kòrda bo kon elegante bo balèt segun koreografia di siglos kompaña pa sinfonia tropikal di palma i bientu’i ost mainta riba mi veranda kayena ta ofrese bo un desayuna dushi mi ta fiha bo kada bes sin aliento aya tòg mi no ta pèrd’e para karbonero den friu di wenter riba mi balkon maner’un akrobat vèrsá kologa n’un kordon di pinda inventando kapriola pa mi den pensamentu mi ta biaha di nòrt pa sùit aki den mi hamaka yen di ko’i lesa i ròm-kola mi tin sed atrobe pa aya b'a lagami b’a laga mi den mi kama pashumá laker tur bòltia maner’ un arte di tempestat mi kabes un orkan sin nomber álfabèt garna mi ke ranka bo fo’i spil ma ni mi kara mes un’t ‘ei m’a kustumá ku warwarú ma ora tera sker bisa mi na unda tin refugio awe awe den bashi kologa den frialdat sin ala pia di fofo wowo habrí paden deskonsolá mi Jensen ta tek sin bai dilanti ku e mes urgensia ta kai sera soñonan leve di antes esnan pisá djawe